İran ABŞ hərbi bazasını vurdu - Vaşinqtonda təcili toplantı keçirilir

Yaxın Şərqdə hərbi-siyasi vəziyyət yenidən kritik həddə çatıb. Türkiyənin "Hürriyet" qəzetinin bölgədəki hərbi mənbələrə və canlı yenilənən məlumatlara istinadən yaydığı son xəbərə görə, İran İslam İnqilabı Keşikçiləri Korpusu (SEPAH) regiondakı ABŞ hərbi bazasına raket və PUA-larla zərbələr endirib.

Məlumata görə, hücum intensiv raket atəşi və kamikadze dronların tətbiqi ilə müşayiət olunub. ABŞ hərbi bazasındakı hava hücumundan müdafiə sistemlərinin aktivləşdiyi, lakin bəzi zərbələrin hədəfə çatdığı bildirilir. Hücum nəticəsində bazanın infrastrukturuna ciddi ziyan dəydiyi, ölü və yaralıların olduğu bildirilir.

ABŞ Silahlı Qüvvələrinin Mərkəzi Komandanlığı (CENTCOM) hələlik hücumun miqyası və itkilərlə bağlı rəsmi bəyanat yaymayıb, lakin bölgədəki bütün qüvvələrin yüksək döyüş hazırlığı vəziyyətinə gətirildiyi qeyd olunur.

Hücumun ardınca İran rəhbərliyindən və SEPAH komandanlığından çox sərt mesajlar gəlib. Tehran rəsmiləri bu addımın regiondakı xarici hərbi mövcudluğa və İrana yönələn təhdidlərə cavab olduğunu vurğulayıblar. Verilən bəyanatda ABŞ-ın bölgədəki fəaliyyəti kəskin tənqid olunaraq, "təhdidlər tamamilə aradan qaldırılana qədər müharibəyə və müqavimətə davam ediləcəyi" vurğulanıb.

Hərbi ekspertlər bu birbaşa zərbəni İran və ABŞ arasında son dövrlərin ən təhlükəli hərbi eskalasiyası kimi qiymətləndirirlər. Ağ Evin və Pentaqonun bu hücuma verəcəyi cavabın regional müharibə alovlandıra biləcəyi ehtimalı beynəlxalq birliyi ciddi təşvişə salıb. Hazırda Vaşinqtonda dövlət rəsmilərinin təcili toplantı keçirdiyi bildirilir.