İran müharibə başlayandan bəri ilk dəfə BU ÖLKƏNİ VURDU

İran Suriyanın şərq hissəsinə zərbə endirib. Bu, regionda müharibə başlayandan bəri Tehranın Suriya ərazisinə birbaşa ilk hücumudur.

Hurriyyet.info  xəbər verir ki, bu barədə "Reuters" agentliyi məlumat yayıb.

İran dövlət mediasının yaydığı məlumata görə, hücuma görə məsuliyyəti İslam İnqilabı Keşikçiləri Korpusu (SEPAH) öz üzərinə götürüb.

Zərbənin İranın İranşəhr şəhərində iranlı hərbçilərin həlak olmasına birbaşa cavab olduğu bildirilir.

Suriyadakı hərbi mənbə hücumun Əl-Tanf bazası yaxınlığında baş verdiyini, lakin obyektin özünün zərər görmədiyini dəqiqləşdirib.

İlkin məlumatlara əsasən, atəş nəticəsində tələfat və irimiqyaslı dağıntı qeydə alınmayıb.

Dəməşq hazırda qonşu dövlətləri bürüyən daha geniş regional münaqişəyə cəlb olunmaqdan qaçmağa çalışır. Hələ mart ayında Suriya prezidenti Əhməd əş-Şaraa ölkəsinin gərginlikdən kənarda qalmağa can atdığını ictimaiyyət qarşısında vurğulayıb.

Londondakı "Chatham House" analitik mərkəzində çıxışı zamanı o bəyan edib ki, birbaşa hücuma məruz qalmayacağı və hər hansı tərəfin hədəfinə çevrilməyəcəyi təqdirdə Suriya münaqişədən kənarda qalacaq.

Xatırladaq ki, İran Yəmən husilərinə müraciət edərək, ABŞ-ın İranın enerji infrastrukturuna zərbə endirəcəyi təqdirdə Qırmızı dəniz vasitəsilə neft marşrutunu bağlamağa hazır olmağı xahiş edib.

Qeyd edək ki, iyulun 16-da ABŞ İrana yeni zərbələr endirib. Bu hücum Hörmüz boğazında gəmiçilik həcminin kəskin şəkildə azalmasından beş gün sonra baş verib.