Peskov ABŞ-la gizli danışıqların pərdəarxasını açıqladı: "Tramp Putini dinləməyə hazırdır"

Rusiya və Amerika Birləşmiş Ştatları liderləri arasında baş tutan son birbaşa təmaslardan sonra rəsmi Kreml Vaşinqtonla münasibətlərin gələcək xətti və Ukrayna böhranı ətrafındakı danışıqların pərdəarxası məqamlarını ictimaiyyətə açıqlayıb. Rusiya Prezidentinin mətbuat katibi Dmitri Peskov ABŞ prezidenti Donald Trampın Moskva ilə dialoqa yanaşmasını yüksək qiymətləndirib.

Hurriyyet.info xəbər verir ki, Kreml rəsmisi jurnalistlərə bəyanatında Donald Trampın Rusiya Prezidenti Vladimir Putinin ona çatdırdığı arqumentləri və strateji məlumatları dinləməyə tamamilə açıq olduğunu bildirib. Peskovun sözlərinə görə, Trampın Ukrayna müharibəsi ilə bağlı mövqeyi kifayət qədər ardıcıldır və onun bir flüger kimi tez-tez fikir dəyişdirdiyinə dair yayılan iddialar tamamilə həqiqətdən uzaqdır. İki lider arasında baş tutan son telefon danışığının Rusiyanın rəsmi mövqeyini birinci şəxsin dilindən ABŞ rəhbərliyinə birbaşa çatdırmaq üçün mükəmməl bir fürsət olduğunu qeyd edən mətbuat katibi, həm Putinin, həm də Trampın yaxın vaxtlarda bu təmasları intensiv şəkildə davam etdirmək barədə ortaq anlaşmaya sahib olduqlarını vurğulayıb.

Bununla yanaşı, Dmitri Peskov Rusiyanın daxili təhlükəsizliyi və xarici hərbi tərəfdaşlıqları ilə bağlı daha bir neçə mühüm məsələyə toxunub. O bəyan edib ki, Vladimir Putin tərəfindən Rusiya Federasiyasına qarşı müharibənin davam etdirilməsində maraqlı olan xarici "təhrikçilərin" prosesə cəlb olunma dərəcəsini dərindən analiz etmək barədə göstəriş verilib və bu tapşırıq birbaşa Rusiya Müdafiə Nazirliyinə, eləcə də xüsusi xidmət orqanlarına (kəşfiyyata) həvalə olunub. Sonda Rusiya və Çin Silahlı Qüvvələrinin keçirdiyi birgə hərbi təlimlərdən danışan Kreml rəsmisi, bu manevrlərin qlobal təhlükəsizliyə xidmət etdiyini və hər hansı üçüncü dövlətə qarşı yönəlmədiyini iddia edib.