PSJ “Barselona”nın ulduz futbolçusunu transfer edir

Fransanın PSJ klubu İspaniyanın "Barselona" komandasında çıxış edən hücumçu Ferran Torresi heyətinə qatmağa yaxındır.

Milli.Az xəbər verir ki, Paris təmsilçisi 26 yaşlı futbolçu ilə transfer məsələsində ilkin razılığa gəlib.

Bildirilir ki, "Barselona" əvvəlcə Torreslə yeni müqavilə imzalamağı planlaşdırsa da, sonradan vəziyyət dəyişib. Kataloniya klubunun Dortmund "Borussiya"sından Kərim Adeyemini transfer etməsi ispan hücumçu ilə yeni sözləşmənin bağlanmasını çətinləşdirib.

Ferran Torresin "Barselona" ilə hazırkı müqaviləsi 2027-ci ilin yayına qədər qüvvədədir.

Qeyd edək ki, Torres 2022-ci ildən Kataloniya klubunun formasını geyinir.