"Putinin yalnız bir üstünlüyü qalıb"–Zelenski ABŞ-da hər şeyi açıqladı

Ukrayna Prezidenti Volodimir Zelenski jurnalistlərə verdiyi son bəyanatında cəbhədəki vəziyyətlə bağlı sensasion fikirlər səsləndirib.

Musavat.com xəbər verir ki, dövlət başçısı Rusiya lideri Vladimir Putinin artıq hərbi üstünlüyə malik olmadığını qətiyyətlə vurğulayıb. Zelenskinin sözlərinə görə, hazırda Ukrayna üçün mühüm bir fürsət pəncərəsi açılıb, çünki ölkə həm döyüş meydanında, həm də hava məkanında əhəmiyyətli dərəcədə güclənib və bu real nəticələri hər kəs aydın görür.

Zelenski qeyd edib ki, Putin rəsmi hesabatları alsa da, almasa da, artıq heç bir üstünlüyünün qalmadığını özü də yaxşı başa düşür. Rusiya ordusunun əlində yalnız ballistik raketlərin və dinc əhaliyə qarşı yönəlmiş dəhşətli, faciəvi zərbələrin qaldığını deyən Ukrayna lideri, bunun yeganə və son rəqabət gücü olduğunu bildirib.

Eyni zamanda ABŞ Prezidenti Donald Tramp və digər dünya liderləri ilə keçirdiyi son görüşlərə toxunan Zelenski, əvvəllər təmasda olmadığı dövlət rəhbərlərinin belə artıq Ukraynanın qat-qat gücləndiyini yekdilliklə qəbul etdiyini diqqətə çatdırıb.